Napilaan iti kaso ti maysa a babai, 27-anyos, maysa a kahera idiay Puguis, La Trinidad, Benguet, tubo ti Bontoc, Mt. Province ken residente ti Riverside, Guisad, Central, Baguio City kalpasan a maatap a tinakawna ti kuarta iti pagtabtrabahuanna.
Maibasar ti imbestigasyon ti pulisya, ti suspek ket tinangdanan ti biktima, 40-anyos, negosyante a tubo ti San Miguel, Bulacan ken residente ti Camp Kamiko.
Idi bulan ti Abril, sakbay a nagbakasyon ti biktima iti ballasiw-taaw, intalekna ti pannakaimanehar ti negosyo daytoy.
Malaksid iti dayta, intalekna pay ti 90,000.00 a gatad para iti mabayadan iti construction ken nangibati pay daytoy ti kanayunan nga P80,000.00 iti storage room kas contingency funds.
Sakbay a nagsubli ti biktima manipod iti bakasyon iti ballasiw-taaw idi bulan ti Hulyo, kiniddaw ti suspek a maiyakar ti day-off-na gapu tapno dumar-ay iti graduation ti kabagianna.
Nupay kasta, saanen a nagsubsubli ti suspek.
Kabayatanna, ti met biktima a nagawid iti kapada a bulan ket naduktalanna a saan a simrek ti suspek.
Inurayna pay ti suspek ken inawaganna daytoy ngem saan a nagparikna.
Idi sinukimat ti biktima ti nangidulinanna kadagiti kuarta ket nadiskobrena a mapukpukaw ti kuarta a naglakuan dagitoy a dumanon iti P85,000, ken mapukpukaw ti nabati a construction funds a dumanon iti 41,714.00 ken ti contingency cash nga 80,000.00.
Gapu iti dayta, P257,385 ti pakabuklan a natakaw manipod iti biktima.
Napilaanen ti suspek iti alleged qualified theft.//Bombo Noveh Organo
