Naka-red alert status itan ti Benguet Electric Cooperative (BENECO) gapu iti agtultuloy a panagtudtudona nga ituntunda ti Southwest Moonsoon iti napalabas a dua a lawas.
Immunan nga indeklara ti nasao a kooperatiba ti Blue Alert status idi July 7, sakbay ti Tropical Cyclone a “Bising.”
Iti pannakiuman ti Bombo Radyo kenni Laarni Ilagan, Community Relations Association-BENECO, kinunana a panagsagana daytoy iti posible a panagreggaay ti daga ken dadduma pay a posible a mapasamak iti siudad ti Baguio ken probinsia ti Benguet.
Inlawlawag ni Laarni a ti Blue Alert Status ket panangisagana kadagiti personnel, alikamen, ken materiales para iti posible a panagresponde iti emerhensia, bayat nga iti sidong ti Red Alert Status ket panangi-activate iti kanayonan a manpower, mangikabil iti ad-adu a linemen on call, ken mangisayangkat ti napartak a panagsukimat ti sistema ti koriente.
Sigun kenni Ilagan, ti desision a maipangato iti Red Alert ket kasaruno ti assessment nga insayangkat dagiti engineer ti Network Services Department ti BENECO.
Impasigurado ni Laarni a nakasaganan dagiti personnel, dagiti alikamen, ken materiales ti BENECO iti panag-restore ti koriente iti kanito a maapektaran ti maysa a disso.
Kabayatanna, maawatan ti benneg ti BENECO ti ibagbaga ti publiko nu maawanan dagitoy ti koriente.
Nupay kasta, kiddawna ti panaganos dagitoy gaputa ar-aramidenda met ti amin tapno laeng maisubli a dagos ti koriente.
