Agtultuloy ti panagpalagip iti Department of Health-Cordillera maipapan iti panakasustinir iti kinadalus dagiti pagtataudan ti danum, panaka-upgrade dagiti water sanitation facilities, panakapasayaat dagiti water infrastructures kasta metten ti naan-anay nga health education ken community awareness campaign nangruna ita a panagtutudo tapno maliklikan ti Diarrhea.
Maibasar iti naibinglay a datos,ngimmato ti kaso iti Diarrhea kadagiti probinsya iti Apayao ken Kalinga iti maudi a lawas ti Abril ita a tawen.
Pakabuklan a 311 a kaso ti nailista nu sadino, lima kadagitoy ti nakumpirmar a pimmusay.
Gapu iti dayta, na-activate ti code white wenno heightened alert kadagiti nasao a probinsya tapno mamobilize dagiti emergency measures kasta metten a naipatungpal ti imbestigasyon ken panakasukimat ti danom.
Sigun kenni Sarah Jeanne Santiago,Nurse III ken Disaster Risk Reduction and Management in Health Officer Assistant iti Department of Health-Center For Health Development-Cordillera, rimwar a water contamination ti rason iti panagngato iti kaso ti nasao a sakit.
Nupay kasta, naibaba itan ti heightened alert gapu ta awanen ti nailista a kanayonan a kaso iti Diarrhea kadagiti nasao a probinsya.
Kabayatanna, karaman kadagiti sintomas iti nasao a sakit ti nadaruy a rugit, panagbakwar, panagsakit ti buksit, panagkakapsot, panaggurigor ken panagsakit ti ulo.
Posible pay a makapasar dagiti pasyente iti panakapukaw ti ganas a mangan, panagulaw ken panagsakit ti muscles and joints.//Bombo Noveh Organo
