Inarestar dagiti otoridad ti maysa a delivery rider iti naipatungpal a buy-bust operation idiay Barangay Bakakeng Central, Marcos Highway, Baguio City itay rabii, July 18, 2025.
Ti suspect ket nabigbig iti alyas Tata nga agtawen iti 33.
Nakumpiskar manipod kenkuana ti maysa a piraso iti keat-sealed transparent plastic sachet a naglaon iti maatap a shabu.
Agdagsen daytoy iti agarop 5.6 a gramo ken agbalor iti PhP30,080.
Malaksid iti dayta, nakumpiskar metaleng manipod iti suspect dagiti daduma pay a non-drug evidence a pakairamanan iti maysa a piraso ti genuine Five-Hundred-Peso bill a nakaparabaw iti peke a Five-Hundred-Peso Bill; 15 a piraso ti Five-Hundred-Peso fake bills a naaramat kas boodle money; maysa a cellphone ken maysa a lighter.
Naiturong ti suspek ken dagiti non-drug evidence iti Philippine National Police Drug Enforcement Group-Special Operations Unit-Cordillera Office para iti umno a dokumentasyon ken disposisyon.
Dagiti met nakumpiskar nga iligal a droga ket maiturnover iti Regional Forensic Unit-Cordillera idiay Camp Major Bado Dangwa, La Trinidad, Benguet para ti qualitative ken quantitative examination.
Kabayatanna, balligi a naipatungpal ti operasyon babaen iti nagtitipon a pwersa ti Philippine National Police Drug Enforcement Group-Special Operations Unit-Cordillera Office(lead unit) Police Regional Office-Cordillera, Philippine Drug Enforcement Agency Baguio-Benguet Provincial Office, Regional Intelligence Division (RID), ken ti Baguio City Police Office-Police Station 10.//Bombo Noveh Organo
