Nagsubside itan ti danom kadagiti nalayos a paset iti Barangay Pico, La Trinidad, Benguet nga intunda iti panagdalapos dagiti nagsasaruno a bagyo ken ti panagraira iti Habagat.
Iti panakiuman iti Bombo Radyo kenni Pico,La Trinidad Councilor Leo Wallace, mapan itan dalusan dagiti bumalay dagiti nalayos a pagtaenganda.
Sigun kenni Wallace, dagiti kadawyan a malaylayos ken agserserbi a catch basin ti agob-overflow a danom manipod iti creek ket dagiti nainsigudan a babbalay a naibangon idiay a saan pay a naiparenovate.
Nupay kasta,kinuna ti opisyal nga ammon dagiti sigud nga agnanaed ti agbakwit wenno makigian kadagiti kakakbagyanda sakbay pay a mapasamak ti panaglayos.
Daduma met a residente nangruna dagiti damo nga agnanaed sadiay ket kadawyan a saan a makasagana ngem maipapaayanda met iti pakdaar sakbay ti kalamidad.
Kabayatanna, iti kaudian a datos nga imbinglay ti opisial iti Bombo Radyo, agarop sangagasut nga household idiay Pico ti naapektaran iti panagdalapos iti bagyo bayat nga adda pay dagiti manarimaan ti panakaberipikarna.
Agtultuloy met latta ti panakaipaay dagiti Family Food Packs ken daduma pay manipod kadagiti maseknan nga opisina kadagiti pamilya a naapektaran.//Bombo Rob Dominguez
