“Bay-am nga ukomen dagiti umili a Pilipino no ania ti inaramid ti Senado iti nairuar a desision idi kalman.”
Daytoy ti sungbat ni Baguio City Congressman Mauricio Domogan nu ania ti reaksionna seknan iti nagbalin a desision ti Senado a maidulin iti “archive” ti impeachment complaint kontra kenni Vice President Sara Duterte.
Iti pannakiuman ti Bombo Radyo kenkuana, kinunana a nasayaat laeng ti nagbalin a desision ti Senado gaputa saan a nadismiss ti kaso.
Para kenni Domogan, mabalin gamin a ma-retrieve manipod iti “archive” ti kaso, saan a kas ti “motion to dismiss” a ‘matay’ ti kaso.
Sigun pay kenkuana, sinurot ti Senado ti nagbalin a desision ti Korte Suprema nga unconstitutional ti impeachment complaint kontra kenni Vice President Sara gaputa nilabsingna ti one year ban a panangipila ti impeachment complaint.
Maipalagip nga idi Hulio 25, nagdesision ti Supreme Court En Banc a ti Articles of Impeachment kontra iti bise presidente ket maiparit iti one-year rule iti sidong ti Constitution. Gapu iti dayta, awan ti hurisdiksion ti Senado iti reklamo ken saan a mabalin a mangisayangkat iti impeachment proceedings.
Kinuna pay ti Korte Suprema a malaksid iti one-year ban, naduktalanda pay a ti impeachment complaint ket panaglabsing iti karbengan ni Vice President Sara iti “due process,” kas nakalanad iti Bill of Rights ti Constitution.
Inladawan ni Domogan a nagbalin a “play safe” ti Senado tapno saan nga agbalin nga aktibo ti kaso.
Idi met nadamag nu posible a mabaliktad ti desision ti Korte Suprema iti immuna a nagbalin a desision nga unconstitutional ti impeachment complaint, kinuna ni Domogan a posible ngem nakadepende iti dagsen ti motion for reconsideration nga impila dagiti sumagmamano nga indibidual.
Iti agdama, maur-uray paylaeng ti resulta ti motion for reconsideration a naipila iti Korte Suprema.
