Kinumpirmar ni Atok Mayor Franklin Smith a nalmes ti maysa a baro nga agtawen ti 20 ken naiyanod idiay Amburayan River, Naguey Atok Benguet idi Martes, August 5.
Iti pannakiuman ti Bombo Radyo kenni Smith, kinunana a naipadamag kenkuada ti nasao a banag iti malem ti nasao nga aldaw bayat ti panagtaripnongda iti Municipal Disaster Risk Reduction Management Council .
Sigun kenni Smith, ti biktima ken ti tallo a padana nga estudiante ket nagturong iti karayan ken nagdigos dagitoy.
Nag-dive ti biktima ken naglangoy ngem naiyanod gapu iti kinapigsa ti ayos ti danum iti karayan.
Pinadas nga isalakan dagiti tallo a kakaduana nga estudiante ngem saanda a nabaelan gapu iti kinapigsa ti danum.
Gapu iti dayta, dagos a nagturong dagiti estudiante iti istasion ti pulisia tapno ipadamag ti napasamak.
Sigun kenni Smith, kalpasan a naawatna iti report manipid iti Atok Municipal Police Station, dagos met a nakikoordinar daytoy iti nagduduma nga ahensia ken imbilinna ti search and rescue operation, nga iti agdama ket manarimaan paylaeng a maipatpatungpal.
Karaman ti Atok MPS, Municipal Fire Station, Municipal Disaster Risk Reduction and Management Office, Barangay Officials iti Naguey, pamilya ken kabagian ti biktima ken dadduma pay a volunteers kadagiti mangisaysayangkat ti operasion.
Kabayatanna, addan ti impaulog ni Mayor Smith a dua nga executive order a mangiparit iti aniaman a water recreational activities wenno aktibidad.
Immapela pay daytoy iti publiko nangruna kadagiti indibidual nga agturturong idiay Amburayan river ken dadduma pay a karayan idiay Atok a makikoordinar ken agpakada kadagiti barangay officials sakbay nga aramiden ti aniaman nga aktibidad.
