Nangipila ni Atty. Romulo Macalintal iti petisyon iti Korte Suprema a mangkidkiddaw iti panakaideklara kas unconstitutional iti Republic Act 12232 wenno ti linteg para iti panakailaylayon iti term of office dagiti opisyales iti barangay.
Sigun kenni Atty. Macalintal, maysa a panangallilaw ti impanaganda iti linteg gapu ta babaen metlaeng iti daytoy ket maitantan ti eleksyon-banag nga nainget nga iparparit iti Korte Suprema nu awan iti rason.
Patien ni Atty.Macalintal a nagbalin laeng nga extension of term ti inyawagda iti nasao a linteg tapno saan a madlaw ti Korte Suprema ti pudno a gandat daytoy a mangitantan iti eleksyon.
Nangisumitir metlaeng ni Atty.Macalintal iti Temporary Restraining Order para iti saan a panakaiyimplimintar iti nasao a linteg.
Maipalagip nga idi laeng Mierkules, pinirmaan ni President Ferdinand Marcos Jr. ti Republic Act No. 12232 a mangilaylayon iti term of service dagiti opisyales iti barangay ken ti panakaitantan iti 2025 December Barangay and Sangguninag Kabataan Elections.
Kabayatanna, immuna metten nga indeklara iti Korte Suprema nga unconstitutional ti Republic Act 11935 wenno ti panakaitantan iti December 2022 Barangay and Sangguniang Kabataan Elections-maysa a kaso a patien dagiti daduma nga awan ti nagdumaanna iti agdama a Republic Act 12232.
