BAGUIO CITY- Bimmaba ti bilang dagiti turista iti siudad ti Baguio gapu iti saan a nasayaat a sasaaden ti panawen ken ti kasasaad ti Kennon Road.
Gapu iti dayta, agdu-dua dagiti turista a sumang-at iti siudad ti Baguio.
Malaksid iti dayta, nakaapiktar metlaeng dagiti panaglayus kadagiti kalsada a paturong iti siudad kas iti Bulacan.
Iti pannakiuman ti Bombo Radyo kenni Andrew Pinero, pannakangiwat ti Hotel and restaurant iti siudad ti Baguio, kinunana a dakkel metlaeng ti epekto ti nangina a pamasahe kadagiti transportasion iti pagilian.
Innayon ti nasao nga opisial nga ad-adda a pilien dagiti dadduma a Pilipino nga agtravel iti dadduma a pagilian a mangidiay-diaya iti promo.
Gapu iti dayta, ising-singasing na a kasapulan a pagsaritaan dagiti local tourism stakeholder iti pagilian ti panagtitinnulong da, tapno maipangpangruna a maitandudu ti turismo iti pagilian sakbay dagiti dadduma.
Impeksa ni Pinero a nasayaat nga agtitinnulong dagiti ahensia ti gobierno tapno makabukelda iti package ken maliklikan ti panagturong dagiti turista iti ballasiw taaw.
Innayonna a kasapulan a sukimaten dagiti airlines ti nagdumaan ti local ken international fights, agsipudta nabab-baba dagiti sumagmamano nga international fights no idilig ti local.
Isingsingasing pay ni Pinero kadagiti airlines nga i-rationalda ti prices tapno ma-ingganyo dagiti Pilipino a tagiragsaken ti bukod a turismo ti pagilian.//mp4
