Dinismisar ti maysa a korte iti siudad ti amin a nabatbati a “criminal accusations” kontra ken da Camp John Hay Development Corporation (CJHDevCo) Chairman Robert Sobrepeña ken Fil-Estate Management Inc. (FEMI) executive Ramon Jimenez.
Iti pangngeddeng nga impaulog ti Municipal Trial Court ti Baguio City, Branch 5, naduktalan ti korte a napaay ti prosekusion a mangipakita iti umdas nga ebidensia a mangsuporta kadagiti “claim” kontra kadagiti dua nga ehekutibo, a nagresulta iti naan-anay a pannakadismiss ti kaso.
Maak-akusaran dagiti nasao nga indibidual iti mapapati a syndicated estafa — maysa a serioso a reklamo a panagkusit iti sidong ti Presidential Decree No. 1689. Nupay kasta, idi Agosto 2025, imbaba ti Office of the City Prosecutor ti kaso kas maysa a minor offense a naklasipikar nga “Other Deceits” iti sidong ti Article 318 ti Revised Penal Code.
Ti desision ket kasaruno ti pannaka-review ti reklamo ken dagiti “supporting documents,” a nangibutaktak nga awan ti pammaneknek a panagkusit wenno panggep a mangallilaw.
Agpada a ni Sobrepeña ken Jimenez ket nabasaan a “not guilty” bayat ti arraignment itay kallabes.
Gaputa kurang dagiti pammaneknek a sapsapulen ti linteg, inkeddeng ti korte a ti kaso ket saan nga agtuloy.
Iti statement met ti Camp John Hay Development Corporation, agtaltalinaed ti takderda nga amin a transakion ket naisayangkat iti ligal ken “in good faith.”
Gapu iti panggeddeng, impaganetget ti nasao a korporasion ti “commitment” daytoy nga itandudoda ti karbengan dagiti stakeholders ken dagiti partners dagitoy, ken inyebkasda a ti kinapudno iti nasao a banag ket binigbig ti sistema ti linteg.
