La Trinidad, Benguet – Naka-red alert status ita ti Benguet Provincial Disaster Risk Reduction and Management Office kasaruno ti pannakaipasidong ti dadduma a lugar ti Benguet iti tropical cyclone wind signal number 4 ken number 3 gapu iti Typhoon Paolo.
Iti interview ti Bombo Radyo, kinuna ni Jessie Domeris, dadaulo ti Benguet Provincial Disaster Risk Reduction and Management Office, manarimaan ti koordinasyonda kadagiti local offices dagitoy maipapan iti sitwasyon dagiti nagduduma a munisipyo.
Dinakamatna nga itay pangaldaw ket awan paylaeng ti namonitor a road closure kadagiti primary ken major roads iti probinsiya.
Iti baet daytoy, kidkiddawenna kadagiti umili a nu awan ti napateg a papanan dagitoy ket liklikanda paylaeng ti agbiahe tapno saan a mastranded dagitoy.
Inyunay-unayna pay ti dagus a panagbakwit dagiti umili nga adda kadagiti landslide prone areas bayat a nasapa tapno maliklikan dagiti saan a nasayaat a pasamak.
