Aglusulos ni Senate President Pro Tempore Panfilo Lacson kas dadaulo iti Senate Blue Ribbon Committee a manarimaan a mangim-imbestigar kadagiti naanomalyaan a flood control projects.
Iti statement ni Senator Lacson, inlawlawagna a ti desisyon na ket gapu kadagiti mangmangngeganna a komento manipod kadagiti kakadwana a senador ken ti panagdudua dagitoy iti panangidaulona iti nasao a komite.
Sigun kenni Senator Lacson, nu adun dagiti nangipeksa iti panakadismaya iti wagas ti lideratona ket patienna a nasayaat laengin nga aglusulos ken ipaima ti posisyon kadagiti daduma a miembro iti senado a makabael a mangidaulo kadagiti panagdengngeg.
Kabayatanna, iti baet ti panggep ti senador a panaglusulos, impettengna a saan a dita nga agpatengga ti trabahona a paksyaten ti korapsyon ken ti panangabuso iti pondo a para koma kadagiti umili.
