Inlawlawag ni Commission on Elections Chairman Atty. George Erwin Garcia a saan a mabalin nga ipatungpal ti snap elections nu awan iti paglintegan para iti daytoy.
Sigun kenni Atty. Garcia, awan pay iti constitutional ken legal framework iti agdama a maaramat para iti panakaipatungpal iti snap elections iti sidong iti 1987 Constitution.
Iti bileg iti 1987 Constitution, naimadato iti daytoy ti fixed term limits para kadagiti opisyales iti gobyerno.
Innayon ni Atty. Garcia a ti snap elections ket nalaklaka a maipatungpal kadagiti parliamentary government gapu ta nu naideklara ti maawagan a loss of confidence ket mabalinda nga agbutos manen tapno mabaliwan ti mangidadaulo kadakuada.
Maipalagip nga insingasing ni Senator Alan Peter Cayetano ti snap elections kadagiti nangangato a posisyon iti gobyerno kas iti presidente, bise presidente, senador ken kadagiti kongresista.
Daytoy ket gapu ta patien ni Senator Cayetano a kumarkaron ti panakapukaw ti panagtalek dagiti umili iti nasyunal a gobyerno.
Iti statement, kinuna ni Senator Cayetano nga iti baet nga adda dagiti pudno a sumupsuporta kadagiti pulitiko, saanen a mailibak nga iti agdama ket dagitoy dagiti makitkita a suspek kadagiti iregularidad partikular kadagiti flood control projects.
