Nakipagkita ni President Ferdinand Marcos Jr. kadagiti Pilipino idiay South Korea idi kalman kagiddan ti naituding a panakipasetna iti maika-32 nga Asia-Pacific Economic Cooperation (APEC) Economic Leaders’ Meeting.
Dumanon iti 212 a Pilipino manipod nagduduma a lugar idiay South Korea pakairamanan iti Busan, Seoul, Ulsan,ken Jeju Island ti nakipagmeet-and-greet iti presidente idiay Wyndham Grand Busan Hotel.
Iti mensahe ni President Marcos Jr., impettengna ti suporta iti administrasyon daytoy iti pagsayaatan dagiti Overseas Filipino Workers(OFW).
Maysa kadagiti inkari ti presidente a makaipaay iti pagsayaatan kadagiti Pilipino idiay South Korea ti manamnama a panakaadda iti Philippine consulate idiay Busan ken Social Security System office iti Philippine Embassy idiay Seoul.
Kabayatanna, maibasar iti kaudian a datos iti Department of Foreign Affairs(DFA), nasurok 70,000 a Pilipino itan ti agnanaed idiay South Korea nu sadino, 42,000 kadagitoy ket OFW.
