Napilaanen ti kaso a frustrated homicide ti maysa a lalaki, agtawen ti 36, naasawaan, maysa a mannalon a tubo ti probinisa ti Benguet ken residente ti munisipyu ti La Trinidad kalpasan a dinangranna ti maysa a babai gapu iti panaginum ti nasanger nga arak.
Maibasar iti report ti La Trinidad Municipal Police Station, ti insidente ket napasamak idiay Central Bahong La Trinidad, Benguet.
Ti biktima a babai ket agtawen ti uppat a pulo ket lima, naasawaan, tubo ti probinsia ken residente ti La Trinidad, Benguet.
Iti imbestigasion dagiti kameng ti pulisya, agiinum ti arak ti suspek kaduana dagiti dadduma pay a lalaki iti maysa a shanty a kukua ti biktima.
Bayat a manarimaan ti panagtungtong dagitoy, kellaat a naginum ti suspek ken pimmanaw manipod iti pagiinumanda.
Sumagmamano a minutos ti napalabas, nagsubli ti suspek ken nagisawang ti nagsasakit a balikas ken intudona ti biktima a paltuganna daytoy.
Iti dayta a gundaway, kellaat nga adda ti inruarna a paltog ken intutokna iti biktima ken kinalbitna daytoy, ket natamaan ti kannigid nga ima ti biktima.
Apaman a napaltugan ti suspek ket timmaray daytoy.
Dagos met a naitaray ti biktima iti ospital babaen kadagiti kakaduana.
Naduktalan a ti biktima ken ti suspek ket aglive-in partner.
Naisayangkat met a dagos ti hot pursuit operation a nangitunda ti pannakatiliw ti suspek.
Iti kaudian a report ti pulisya, nakaruaren ti biktima manipod iti ospital ken napilaanen ti kaso ti suspek. | via Bombo Noveh Organo
