Binallaagan manen ti Municipal Disaster Risk Reduction and Management Office dagiti umili ti Itogon, Benguet nangruna dagiti minero kagiddan ti posible nga iseserrek ti maysa a super typhoon iti pagilian.
Iti pannakiuman ti Bombo Radyo ken ni Itogon Municipal Disaster Risk Reduction and Management Officer Engr. Cyril Batcagan, kidkiddawenna kadagiti boss ken financer dagiti small-scale mining a bagaanda dagiti tattaoda a saanda paylaeng nga umintra wenno sumrek kadagiti tunnels.
Guyguyugoyenna pay dagiti nagduduma a barangay nga agreport dagitoy a dagus nu adda ti saan a mapakpakadaan a pasamak.
Iti agdama ket agtultuloy ti monitoring ti Itogon, Benguet kadagiti masakupanda a lugar kas mitigation plan.
Dinamakat ni Batcagan nga adda dagiti nakitada a paset ti pagminasan a narisgo iti panagreggaay nga isu ti ipapaayanda iti atensyon.
Imbinglayna pay nga adda dagiti nakitada a paset ti daga a kellaat lattan a lumluned malaksid pay kadagiti immuna a nakitada a delikado a lugar ken pasdek idiay Itogon a mangipaspasimudaag iti sinking area.
Gapu iti daytoy, minarkaanda dagiti babballay nga asideg ken isu ti imonmonitorda tunggal kalamidad.
Karaman kadagiti nabigbig kas kritikal area idiay Itogon ket ti Barangay Virac ken Sitio Luneta idiay Barangay Loakan nga isu ti nainget a bambantayanda para iti posible a pannakaipatungpal ti pre-evacuation nangruna nu dumalapos ti maibagbaga a supertyphoon.//Bombo Karen Sapirao
