Dinayyeg ti Magnitude 5.7 a ginggined sadiay Hinatuan, Surigao del Sur iti pasado 1:53 a.m, Lunes idi Disiembre 22, 2025.
Narikna daytoy iti nagduduma a paset ti nasao a lugar, pakairamanan ti Surigao del Norte, dadduma a paset ti Davao ken Butuan City.
Maibasar iti earthquake bulletin ti Philippine Institute of Volcanology and Seismology (PhiVolcs), addaan daytoy iti kauneg a 10 kilometers.
Nailista ti sentro daytoy iti 135 kilometers iti amianan ti Hinatuan, Surigao del Sur.
Mainaig iti dayta, narikna dagiti residente sadiay Bislig City ti Intensity III a ginggined.
Sigun kadagiti otoridad, awan ti nailista a nadangran a tattao ken awan ti pannakadadael kadagiti anya man a sanikua dagiti residente.
Kabayatanna, nabalakadan ti publiko nga agtalinaed a kalmado, agsaganada iti posible nga aftershock ken batayanda ti anunsyo dagiti maseknan nga otoridad.
