Saan pay a kinumpirmar ni Senator Imee Marcos nu umatendar daytoy iti panagdengngeg iti Senate Blue Ribbon Committee, ala una inton malem.
Daytoy ket maatap nga adda pakainaiganna iti napasamak a suppiat iti nagbaetanda kenni Senate President Pro Tempore Panfilo “Ping” Lacson a nagbanag iti personal a panagatake.
Maipalagip nga inakusaran ni Senator Lacson ni Senator Marcos nga addaan daytoy iti ₱2.5 billion iti “allocable” funds iti 2025 national budget, kas maibasar iti rekords manipod ken daydi sigud a Department of Public Works and Highways (DPWH) undersecretary Maria Catalina Cabral.
Sigun met kenni Senator Marcos, ti 2026 General Appropriations Act (GAA) a pinirmaan ti kabsatna a ni President Ferdinand Marcos Jr. ket saan a developmental budget nu di ket napulitikaan.
Innayonna a nabingay ti budget kadagiti sumagmamano a paset para iti maatap a panakaipila iti baro manen nga impeachment complaint kontra kenni Vice President Sara Duterte.
Malaksid iti dayta,inakusran ti Senator Marcos ni Senator Lacson a laplapdanna ti panakaidawit ti nagnagan ti daduma a personalidad kadagiti kontrobersyal a flood control projects kas kenni sigud nga House Speaker Ferdinand Martin Romualdez.
Nupay kasta, pinaglibakan daytoy ni Lacson nu sadino,impettengna a saan nga umat-atendar ni Senator Marcos iti panagdengngeg.
Gapu iti dayta, inimbitaran ni Lacson ni Marcos nga umatendar iti panagdengngeg ita nga aldaw tapno mangipaay iti ebidensya a mangsuporta kadagiti alegasyonna.
