Panggep ti House Committee on Justice a talantanen dagiti impeachment complaints kontra kenni President Ferdinand Marcos Jr., inton Pebreo 2 aginggan Pebrero 4 ita a tawen.
Sigun kenni House Committee on Justice Chairperson Representative Gerville “Jinky Bitrics” Luistro, kasapulanen a mai-consolidate dagiti reklamano a naiyuman kadakuada kas mailinya iti proseso ti Kamara.
Kinunana a maisayangkat ti konsolidasyon iti umuna a panagdengeg ti komite. Inayunna a tratuenda dagiti nasao a reklamo kas maymaysa a kaso ken maminpinsan a talantanen dagitoy ti Justice Committee.
Inlawlawag met laeng ni Luistro nga inton umuna a panagdengeg dagitoy, ti sentro pagtatalantanan dagitoy ket ti sufficiency ken dagsen ti basaran dagiti nasao a reklamo ken nu agkurang ti panawen, mangituding danto pay ti kanayonan nga aldaw ti panagdengeg inton sumaruno a lawas.
Dinakamatna pay nga adda laeng ti naipaay nga 60 nga session days tapno mangisumitirda ti report isu’t gapunna a saanda nga idardaras ti panagdengeg dagitoy seknan iti nasao nga isyu. // Bombo Karen Calpoe Sapirao
