Kayat ni DPWH Sec. Dizon a malpas ti pannakapapintas wenno rehabilitasion iti Kennon Road sakbay ti Semana Santa, nu sadinno manamnama ti panagbisita ti adu a turista iti siudad iti Baguio.
Ti 33.5 kilometro a kalsada iti probinsia iti Benguet ket mangibabaet iti Rosario, La Union ken siudad iti Baguio.
Iti naisayangkat a press conference idi Sabado, Pebrero 28, imbilinna kadagiti baro a regional director ken district engineer nga ipasigurado a nasayaat daytoy. Kayatna a sakbay iti Semana Santa, mapasayaat ti kalsada gaputa adda ti one-way iti paset a pagpagnaan dagiti motorista.
Kinunana a kasapulan metlaeng a maisimpa ti rock shed a binisita ni President Ferdinand “Bongbong” Marcos Jr. idi napalabas a tawen, kasta metten ti slope protection kadagiti kangrunaan a pagnaan iti Baguio, Benguet, ken iti sibubukel a rehion Cordillera.
Imbinglay ni Dizon, nga idi dinutukan daytoy iti Presidente iti DPWH idi napalabas a tawen, nalawag ti direkta kenkuana a siguraduen a mamintinir ti kinasayaat dagiti kalsada ken rangtay iti amin a pagilian.
Ni Dizon ket kangrunaan a guest iti naisayangkat a grand street dancing parade iti Panagbenga Flower Festival ken manamnama a sukimat metlaeng dagiti infrastructure project iti siudad.
