Inwaragawag ti Bureau of Customs (BOC) nga umdas laengen iti dua a bulan ti suplay ti pagilian iti produkto a petrolyo.
Daytoy ket kagiddan ti mapaspasamak a tension sadiay Middle East.
Sigun kenni Bureau of Customs Commissioner Ariel Nepomuceno, ininspeksion ti BOC dagiti bodega ken depot ti oil company tapno masigurado nga awan ti artificial shortage iti pagilian.
Impetteng ti nasao nga ahensia a nainget ti panagmonitorda kontra iti posible a panag-hoarding ken profiteering kadagiti produkto a petrolyo.
Mainaig iti dayta, posible a mangapektar ti tension sadiay Middle East iti tax collections manipud kadagiti petroleum products.
Kabayatanna, immuna a kinuna ti Energy Dept. nga isagsaganada dagiti addang tapno mapalag-an ti epekto ti agtultuloy a tension iti Middle East iti kasasaad ti suplay ken presio ti petrolyo iti pagilian.
