Naduktalanen iti Environmental Management Division ng City Environment and Parks Management Office (CEPMO) dagiti kangrunaan a rason iti polusion kadagiti karayan iti siudad.
Sigun kenni EMD head Engr. Sofronio Pascua, karaman kadagiti kangrunaan a rason ti iligal a panangibelleng iti wastewater, direkta a panangibelleng iti narugit a danum kadagiti creek, tumtumpaw a septic tank, “runoff” manipod kadagiti kanal ken drainage system, ken saan a nasayaat a panangibelleng iti solid ken animal waste.
Kinuna ni Pascua a kanayon a pakaseknan dagiti septic tank a direkta a mangiruruar iti narugit a danum kadagiti pagayusan iti danum ken ti kinakurang iti regular a desludging.
Iti agdama a tawen, 782 a lugar nga asideg kadagiti creek ti nasukimat iti CEPMO, a nagresulta iti 346 notices of violation para iti panaglabsing iti environmental laws.
Dumanon met iti 83 violators ti namulta gapu iti direkta a panangibelleng iti wastewater kadagiti pagayusan iti danum.
Agtultuloy ti panagmonitor iti CEPMO ti kasasaad iti Balili ken Bued river nga agtaltaltalinaed a kontaminado gapu iti nangato a fecal coliform ken Biochemical Oxygen Demand levels.
