NATONIN, MT. PROVINCE– Posible nga adda ti Foul play iti ipupusay ti 3-anyos nga ubing idiay Sitio Batnong, Barangay Banawel, Mountain Province idi May 24, 2026.
Iti interview ti Bombo Radyo kenni Natonin Mayor Jose Tiago Agagon, kinuna nga iti inisyal nga imbestigasion, nadunor ti likud a paset ti ulo ken ngiwat ti biktima.
Sigun iti Mayor, naipa-autopsy sadiay Tabuk City, Kalinga ti bangkay ken maur-uray paylaeng ti resulta.
Impetteng ti opisial a daytoy ti kaunaan nga insidente a napasamak iti nasao a lugar.
Kabayatanna, kidkiddawen ni Mayor Agagon kadagiti opisiales ti Barangay a paingtenda ti ronda, adda man ti okasion wenno saan tapno saan a mapasamak ti kapada nga insidente.
Namnamaen ti opisial nga agtitinnulong dagiti opisiales ken dagiti residente a mangipaay iti impormasion a makatulong iti imbestigasion.
Maipalagip nga iti immuna a report ti Natonin Municipal Police Station, nasarakan ti biktima iti likudan ti St. Martin de Porres Chapel idiay Sitio Batnong, Banawel, Natonin, Mountain Province.
Dagus a naitaray iti Anastacia Rafael Sagel Memorial Hospital idiay Poblacion, Natonin, Mountain Province ngem indeklara ti attending physician a ni Dra. Dr. Mari rose Tocuboy a pimmusay gapu iti traumatic brain injury.
Maibasar iti inisyal nga imbestigasion dagiti otoridad, nagbakasion ti biktima idiay Natonin ken dimmar-ay kaduana ti lolana iti Barangay Amamong a naangay iti Banawel Elementary School idiay Sitio Batnong, Banawel, Natonin.
Napukaw ti biktima idi May 23 ken nasarakan idi May 24, 2026 nga awanan biag iti likudan ti St. Martin de Porres Chapel idiay Sitio Batnong, Natonin, Mountain Province.
Iti agdama, agtultuloy ti imbestigasion dagiti otoridad iti napasamak nga insidente.//mp4
