Maisingsingasing iti Baguio City Council ti ordinansa a mangideklara iti Agosto 18 tunggal tawen kas “Mountain Province Day” tapno mabigbig ti pakasaritaan iti relasion iti siudad ken dagiti “i-Montanosa,” kasta metten ti panangpatibker iti preserbasion iti kultura ken identidad.
Panggep iti singasing nga itampok ti nabaknang a sagot iti Mountain Province babaen kadagiti tinnawen nga aktibidad a kas iti parada, panagperform iti tradision iti sala ken ritwal, ken agro-industrial fair a pakipasetan iti sangapulo a munisipyu.
Sigun iti singasing, buklen iti komite para iti panangrambak nga idauloan iti City Tourism Officer ken adda dagiti pannakabagi manipod iti lokal a gobierno ken dagiti organisasion iti Igorot iti siudad.
Mailatang ti P250,000 manipod iti badyet iti siudad para iti umuna a panangimplementar iti panangrambak.
Naaprobaranen daytoy iti umuna a pannakaibasana idi Mayo 11 ken manarimaan ti panagadal iti maseknan a komite.
