Nangisayangkat iti public consultation dagiti opisial idiay Tuba, Benguet tapno talantanen ti singasing a 2026 Revised Comprehensive Tourism Code a panggepna a papigsaen dagiti lokal a piesta ken turismo iti munisipyu.
Maysa kadagiti kangrunaan a probision iti singasing ti panangiyakar iti Ava Festival manipod Setiembre paturong iti maikadua lawas iti Mayo, maibasar iti rekomendasion iti Municipal Agricultural and Fishery Council, tapno agtunos iti panawen iti panagapit iti “ava” ken maliklikan ti pannakadadael iti saan a nasayaat a panawen.
Karaman metlaeng iti ordinansa ti tinnawen a Bamboo Festival tunggal maikatlo a lawas iti Setiembre, a mangitampok kadagiti aktibidad a kas iti cooking contest, bamboo crafts, ken cultural competitions, kasta metlaeng ti Tuba Tourism Week.
Manamnama metlaeng a mapapigsa ti singasing ti partisipasion iti Tuba kadagiti kangrunaan a piesta iti rehion a kas iti Adivay Festival ken Panagbenga Festival, ken mangilatang iti pondo para kadagiti lokal a panangrambak iti sidong iti Municipal Tourism Office.
Ti singasing nga ordinansa ket panangkadua iti agdama a tourism ken farm tourism codes iti munisipyu ken naituding a maipila iti maikatlo a pannakaibasana sakbay a maipasa iti Sangguniang Panlalawigan para iti panagreview ken panagaprobar.
