Nagun-od iti Cordillera Administrative Region iti overall champion iti kickboxing iti Palarong Pambansa 2026 idiay Agusan del Sur kalpasan a naala iti rehiyon ti 3 gold, 3 silver ken 2 bronze medals a nakibalubal kadagiti 10 a sabali a rehiyon.
Iti pannakiuman ti Bombo Radyo kenni Noriel Acquisio, coach ti CAR kickboxing team, kinunana nga uray adda dagiti karit a kas iti napudot a panawen, kinaatiddog iti panagbiahe ken pinansial a rigat dagiti atleta, saan a nagsardeng dagitoy ken nagbalin kitdi nga inspirasionda tapno maalada dagiti medalya ken maipakita ti pigsa iti Cordillera iti nasyonal.
Nangipaay met iti panagyaman ni Acquisio kadagiti nagannak dagiti atleta ken kadagiti indibidual a nangsuporta iti pinansial a kasapulan iti team tapno makapartisipar iti Palarong Pambansa.
Kabayatanna, agsubli ti delegasion iti rehiyon ita nga aldaw, Mayo 31, ken ituloyda ti panangsanay kadagiti atleta para iti sumaruno pay a pasalip.|via Khey Reparip
