Kinemmeg iti Police Regional Office–Cordillera ti most wanted person iti rehion Cordillera idiay Ninoy Aquino International Airport (NAIA) Terminal 1 itay laeng nabiit.
Nabigbig ti suspek a ni John Lerry Amit, nga adda sangsangwenna a kaso a qualified trafficking ken addaan iti warrant of arrest nga awan ti nairekomendar a piansa manipod iti Regional Trial Court Branch 8 idiay La Trinidad, Benguet.
Sigun kadagiti otoridad, natiliw ni Amit iti panagdanonna iti pagilian babaen iti maysa a nagtinnulong nga operasion iti nagduduma nga ahensia karaman ti PNP Aviation Security Group, CIDG-Benguet, Bureau of Immigration, Department of Foreign Affairs, Department of Migrant Workers, ken Presidential Anti-Organized Crime Commission.
Mapapati a karaman ti suspek iti illegal recruitment ken human trafficking nu sadinno dagiti biktima ket naikari iti trabaho iti ballasiw-taaw ken naiturongda idiay Cambodia, ngem napilitan a mangged kadagiti scam operations iti sidong iti nainget a kontrol ken mapapati a panangabuso.
Iti agdama, agtultuloy ti panagsapul dagiti otoridad iti dadduma pay a karaman iti nasao a sindikato bayat a mapatpatibker ti kampania kontra iti human trafficking ken organized crime.
