Kasapulanen nga agmula iti kayo dagiti agnobio ken agnobia nga agap-aplikar para iti pre-marriage counselling certificate kas paset iti panangipatungpal iti Baguio City Environment Code, Ordinance Number 18, series of 2016.
Iti panangidaulo iti Urban Forestry Management Division (UFMD) iti City Environment and Parks Management Office (CEPMO), agkakadua nga agimula iti kayo dagiti aplikante kas simbolo iti panagmaymaysada ken pannakipaset iti panangaywan iti aglawlaw.
Sigun kenni Floro Bastian, dadaulo iti UFMD, dumanon iti 19 nga agnobio ti nangimula itay laeng kallabes iti “love tree” iti parke iti city hall.
Maisaysayangkat ti aktibidad tunggal Lunes ken Miyerkules.
Ti nasao a programa ket saan laeng a maipatpatungpal iti siudad ti Baguio nu diket kasta metlaeng idiay Itogon ken Valenzuela City.
Guyguyugoyen met iti CEPMO dagiti indibidual ken organisasion a makikaykaysa iti panangimula kadagiti kayo kadagiti pagtaenganda ken kadagiti bakante a lote kadagiti barangay manipod kadagiti nursery iti siudad.
Mabalin a makikoordinar iti opisina iti CEPMO iti city hall babaen kenni Atty Rhenan Diwas para iti kanayunan nga impormasion.
