Impaganetget ni sigud a Senate President Aquilino “Koko” Pimentel III a valid ti panagsukat ti dilerato iti Senado.
Nupay kasta, inlawlawagna nga agserserbi kas acting Senate President ni Senator Sherwin Gatchalian.
Sigun kenni Pimentel, “valid” agsipudta adda ti naisayangkat a quorum.
Inlawlawagna nga adda ti quorum gaputa 23 laeng dagiti mabalin a dumar-ay, malaksid iti maysa nga adda iti sidong ti court detention.
Gapu iti dayta, majority paylaeng ti 12 iti 23 a bilang dagiti Senador.
Maipalagip a binutusan dagiti 12 a Senador ni Gatchalian kas Senate President Pro Tempore ken acting Senate President idi June 3, 2026.
Naibasar daytoy iti Avelino vs. Cuenco Case no sadino, mabalin a maisayangkat ti quorum no adda ti majority kadagiti 23 a Senador.
Iti sidong ti nasao a kaso, binigbig ti Korte Suprema a saanen a rumbeng a maibasar ti quorum iti 24 a senador, no di ket kadagiti miembro nga addaan iti legal a kapasidad a mangaramid iti trabahoda iti Senado.
Kabayatanna, impeksa ti sigud a Senate President a situtulok a tumulong tapno maurnos ti tension ken parikot iti Senado.
Nupay kasta, impeksana nga uray saan a tumulong, makitkitana a dandanin a maurnos la kitdi adda ti majority, disente dagiti senador ken ammoda a rumbengda a raemen ti majority.
