Impaulog ti Malolos, Bulacan Regional Trial Court (RTC) ti warrant of arrest kontra kadagiti kontraktor a da Pacifico “Curlee” Discaya, ti sawana a ni Cezarah ken dagiti siam nga indibidual.
Daytoy ket gapu iti “malversation through falsification of public documents” mainaig iti maatap a pakainaiganda iti kickback scheme manipud iti flood control projects.
Naipaulog ti warrant, maysa nga aldaw kalpasan nga impila ti Office of the Ombudsman ti malversation and graft charges kontra kadagiti agassawa a Discaya ken dagiti siam nga indibidual a pakairamanan ni Merg Jaron Laus, Brice Ericson Hernandez, Jaypee Mendoza, Mernesto Galang, Norberto Santos, Lorenzo Pagtalunan, Juanito Coronel Mendoza, Floralyn Simbulan, ken Ma. Roma Angeline Rimando.
Iti nasao a kaso, awan ti inrekomendar ti korte a piansa para kadagiti 11 nga akusado.
Sigun kenni Assistant Ombudsman Mico Clavano, naduktalan iti imbestigasion a na-release ti pondo iti baet a saan a naaprobaran ti Disbursement Voucher para iti rehibilitasion ti river construction structure idiay Bulusan, Calumpit, Bulacan.
Malaksid iti dayta, napaneknekan a naipaay ti bayad para iti dredging ken embankment items nga awan ti basaran para iti computation wenno supporting documents tapno mapaneknekan ti pannakatungpal ti nasao a proyekto.
