Inrekomendar iti Smoke-Free Baguio Task Force ti panangiserra iti 41 nga establisimiento, karaman ti maysa a puneraria, gapu iti maulit-ulit a panaglabsing iti smoke-free ordinance iti siudad.
Sigun kenni Dr. Donnabel Panes, smoke-free program manager, dagiti establisimiento ket addaan iti nasurok tallo a nairekord a panaglabsing.
Karaman kadagitoy ti 21 night restaurants ken bars, 9 a convenience store, 5 a restaurant-café, 3 a kantina iti dry goods, 2 nga entertainment center ken maysa a memorial chapel.
Dinakamat metlaeng ni Panes a maipawil metlaeng ti vaping iti sidong iti ordinansa ken mabigbigbig a katukad iti panagsigarilio.
Binilin metlaeng ni Mayor Benjamin Magalong ti task force a paingten ti kampania kontra iti vaping kagiddan iti panaglukat iti klase.
Kabayatanna, nadutukan ti 16 health centers iti siudad ken ti Baguio General Hospital and Medical Centerkas smoking-cessation clinics tapno tulungan dagiti kayatna nga agsardeng iti panagsigarilio.
Iti sidong iti Ordinance No. 34-2017, maipawil ti panagaramat, panangilako, panangiwaras ken panangipablaak iti sigarilio, vape ken dadduma pay a produkto iti tabako kadagiti parapubliko a lugar.
Ti maulit-ulit a panaglabsing ket mabalin a mamulta ken maawanan iti business permit kas paset iti panangipatungpal iti siudad kadagiti addang para iti parapubliko a salun-at.
