Dumanon laengen iti 36 manipod iti 62 a bus iti Victory Liner nga agbibiahe iti siudad ti Baguio ti agtalinaed nga operational kalpasan a sinuspindir iti LTFRB ti 26 nga unit kasaruno iti aksidente a pakaiaramanan ti dua a buss iti Marcos Highway a nangitunda iti ipupusay iti maysa a babai ken pannadangran iti agarup 90 a pasahero.
Sigun kenni Marcel Gadingan, terminal master iti Victory Liner-Baguio, naapektaran iti tallo pulo nga aldaw a pannakasuspindir ti sumagmamano a ruta karaman ti Baguio-Dagupan, Alaminos, Bolinao, ken Santa Cruz.
Temporario metlaeng a nasuspindir iti kompania ti ruta a PITX-Tuguegarao.
Kinuna ni Gadingan a first-come, first-served laengen ti ticketing para kadagiti naapektaran a biahe, bayat a 52 a drayber ken konduktor a naapektaran ket maiyakar iti dadduma a terminal tapno mapagtalinaed ti trabahoda.
Naipasidong iti panagsukimat ken imbestigasion dagiti nasuspindir a bus, bayat a ti 26 nga unit ken dua a nadadael a bus iti aksidente ket agdama a naikabil iti repair facility iti kompania iti Tarlac para iti panangsukimat ken panangpasayaat.
