Impaganetget iti Special Pupils Education (SPED) Center iti siudad ti Baguio a saan a rumbeng nga agtaeng laeng iti balay dagiti persons with disabilities, nu diket kasapulan a maipaayan iti maitunos nga edukasion tapno maamuanda nga agbiag ken agbalin nga indepenent.
Sigun kenni SPED Center principal Dr. Rommel Manzano, maitunos ti panangisuro maibasar iti kasapulan iti tunggal agad-adal, nga addaan iti pakabuklan a 845 learners karaman ti addaan iti autism, intellectual disability, hearing impairment, ken learning disability.
Inlawlawagna nga ad-adda a maselan ti panagsagana kadagiti klasrum ken dagiti materiales gaputa kasapulan a maliklikan dagiti banag a mabalin a makadistract kadagiti estudiante, nangruna kadagiti addaan iti autism spectrum disorder.
Innayonna pay a limitado iti pito agingga sangapulo ket lima ti “ideal” a bilang iti estudiante iti tunggal klase, ngem dumanon daytoy iti agingga iti duapulo gapu iti kinakurang iti resources, bayat a lima laeng ti adda iti ASD classes.
Adda dagiti estudiante metlaeng a saan a nakapokus iti academic nu diket iti life skills a kas iti panagluto, arts, ken dadduma pay a praktikal nga aktibidad tapno matulungan dagitoy nga agbiag iti ruar iti pagadalan.
Sigun iti SPED, panggep iti programada nga itandudo ti inclusive ken espesial nga edukasion kas maitunos iti Republic Act 11650 tapno masigurado ti umno a suporta para kadagiti learners with disabilities.
