Irekreklamo ti sumagmamano a residente ti agleleak ken naangot nga ayamuum ti angin manipud iti kanal sadiay Molave St., Purok 5, Kias, Baguio city.
Iti pannakaiuman ti Bombo radyo newsteam iti maysa a residente a nagpailinged iti nagan a “Clyde”, dandani dua a tawen a residente daytoy ngem saan paylaeng a narisut ti nasao nga isyu iti kalsada.
Kinunana pay nga awan ti umno a drainage wenno kanal iti nadakamat a kalsada.
Innayon ni Clyde a nu agtudo ket malayos wenno agturong amin ti danum iti kalsada.
Malaksid iti dayta, adda dagiti maak-aksidente gapu iti agdama a kasasaad ti kalsada.
Kabayatanna, sigun kadagiti dadduma pay a residente, tawen 2024 paylaeng ti nasao nga isyu ngem agingga iti agdama ket saan pay a narisut.
Nagpalawag met ditoy ni Victor O. Benlingan Jr. Barangay chairman ti Barangay Kias nga idi paylaeng agserserbi kas Barangay Kagawad a nangisubmitirda iti dua a resolution.
Naipatulod ti resolusion iti maysa a mining company para iti pannakarepair ti nasao a kanal ngem awan ti napaspasamak.
Nupay kasta, nangipasada manen ti sabali a resolution iti opisina ti Congress nga isu ti mai-follow up.
Impeksa ti Kapitan a mayat ti canal idi ngem nabaradoan, rason tapnu agleak.
Inlawlawag pay daytoy a nabayagen ti nasao a kanal ken bassit ti naaramid.
Konektado amin ditoy ti sewer dagiti establishimento kadagiti kalsada ken posible nga adda pay ti dadduma nga agibelbelleng ti inyaman a basura sadiay rason tapnu mapullatan ti nasao a canal.
Sigun kenni Benlingan, agarup P2 million ti kasapulan a gatad para iti total repair ti canal para ti agarup 1 km a distansya manipud ti tanod outpost agingga iti Philex road.
Inlawlawag met daytoy a napagtungtunganda iti council a boluntaryo a kalyenda ngem possible nga agbalin nga eyesoar.
Iti baet dayta, napagtutulaganda nga urayenda ti pondo a maaramat iti total repair ti nasao a canal.
Kidkiddawen met ti nasao nga opisial ti anus dagiti residente.//Bombo Noveh Organo
