Kinontra ni Senator Bam Aquino ti singasing ti Senator Risa Hontiveros nga i-ban dagiti online games a saan a makitinnulong iti imbestigasyon ti senado seknan iti pammaltog a napasamak idiay San Jose National High School idiay Tacloban City idi Hunyo 22.
Insingasing ti nasao a senador a dadaulo ti Basic Education nga imbes nga i-ban dagitoy, rumbeng kitdi a ti pagpokusanda ita ket dagiti addang iti “School Safety Act”.
Maipalagip a maysa kadagiti inimbitaran ni Sen. Hontiveros, Committee Chairman on Women, Children, Family Relations, and Gender Equality ket ti developer ti German-based online game a GoreBox tapno sumango iti mannarimaan a Senate hearing inton Hulyo 1 ngem saan daytoy a sinmango.
Nupay kasta, impanamnama daytoy a makitinnulong daytoy iti imbestigasyon nupay saan dagitoy a makadar-ay iti mismo a panagdengngeg ti senado. //bombokaren.c.sapirao
