Inwaragawag ti Department of Health (DOH) a bimmaba iti 79% ti kaso ti monkeypox (mpox) iti pagilian no idilig kadagiti napalpalabas a tawen.
Sigun kenni DOH spokesperson Undersecretary Albert Domingo, dumanon iti 44 a kaso ti mpox ti nailista manipud Enero 4 agingga Hunio 13, 2026.
Nababa no idilig iti 205 a kaso a nailista iti kapada a period idi 2025.
Daytoy ti kinuna ti ahensiya kasaruno ti naipadamag a kaso ti nasao a sakit iti maysa a condominium idiay Mandaluyong City.
Kabayatanna, kinuna ni Domingo a mabalin nga agipaulog dagiti local government units iti bukodda nga advisories mainaig iti mpox ken public health iti lugar dagitoy.
Maipalagip nga immuna a kinuna ti Department of Health (DOH) a posible ti human-to-human mpox transmission babaen iti direct contact ti kudil ken dadduma pay.
