Imbilin ni Mayor Benjamin Magalong ti nainget a panangipawil iti panagparada kadagiti kangrunaan a kalsada ken sumagmamano a paset iti Marcos Highway a nangrugi idi kalman gapu iti agtultuloy a pakaseknan iti basura ken kinakurang iti disiplina iti sumagmamano a motorista.
Sigun kenni Mayor Magalong, dagiti basura a maibatbati kadagiti igid iti kalsada gapu kadagiti agparparada iti nasao a lugar ket mangituntunda iti saan a nasayaat a buya iti napintas nga aglawlaw.
Impaganetget iti lokal a gobierno a nainget nga ipatungpal ti no-parking policy ken tiliwen dagiti aglabsing ken patawan iti maitunos a multa ken pannusa.
Kidkiddawen metlaeng ni Magalong iti publiko a makikaykaysa iti panagtalinaed iti kinadalus, kinaurnos, ken kinatalged kadagiti kalsada, a sigun kenkuana ket nakadepende iti disiplina ken responsable a kagagalad iti tunggal maysa.
