Inlakasid ni Palace Press Officer Undersecretary Atty. Claire Castro ti maatap a riribuk a napasaranda kabayatan ti opisial a panagbisita ni President Ferdinand “Bongbong” Marcos Jr. sadiay Vancouver, Canada.
Sigun kenni Atty. Castro, inasitgan ti grupo dagiti Pilipino bayat ti panagalada iti video para iti social media reels.
“So, ngumiti ako then tinanong niya ako kung ako si Usec. Claire. Sabi ko, ‘Yes,’ at doon sinasabi na niya, sumigaw na siya, ‘You ask your President to resign” sigun kenni Castro.
Innayon ti opisial a na-harassed dagitoy iti baet a ti kinapudnona ket agtatrabaho dagitoy ken saanda nga agbakbakasyon.
Inyunay-unay ni Atty. Castro nga ar-aramidenda laeng ti trabaho dagitoy.
Iti social media video a naipablaak kadagiti nagduduma a social media accounts, mabuya ni Atty. Castro a magmagna, kaduana ni Presidential Communications Office Director Robertzon Ramirez idi nangrugin nga impukkaw ti maysa a grupo ti pagsasao a Filipino.
Karaman ti ipupukkaw dagitoy ti panaglusulos ti Presidente, mainaig iti maleta ken agtatakaw.
Iti baet dayta, impeksa ti opisial nga iti baet nga adda ti karbengan dagiti tattao a mangibkas iti kapanunutanda, saan kuma a rumbeng nga agbalin a bastos.
“Alam ninyo, may freedom of expression tayo pero hindi naman kailangan maging bastos. Pilipino kayo, hindi naman ganyan ang ugali ng mga Pilipino e,” sigun kenni Atty. Castro.
