Manamnama nga aglukat manen iti Burnham Lake inton bulan ti Agosto bayat nga umas-asideg iti panagkumpleto ti panangpasayaat ken rehabilitasion daytoy.
Sigun kenni Mayor Benjamin Magalong idi Martes, agarup 90% ti nalpas iti proyekto.
Kagiddan iti panaglukat manen iti lake ti panangikabil kadagiti baro a bangka a sumursurot kadagiti na-update a pagalagadan iti kinatalged.
Kinuna a kaaduan kadagiti agdama a bangka ti saan nga agtultulnog kadagiti pagalagadan iti kinatalged ken kasapulan a masuktan.
Nagballaag ni Magalong a mabalin a mapukaw iti permit dagiti operator a saan a sumursurot kadagiti naikeddeng a pagalagadan iti siudad para iti kinatalged.
Impetteng ni Magalong a dagiti natalged, moderno, ken sumursurot kadagiti regulasion a bangka laeng ti mapatgan nga agbiahe iti Burnham Lake.
Naiserra ti Burnham Lake idi Oktubre 2025 para kadagiti kasapulan a panangtarimaan.
Orihinal a naituding a malpas ti proyekto idi Mayo, ngem naitantan daytoy gapu iti krisis iti suplay iti gasolina a nangitunda iti panagngato iti presio dagiti materyales iti konstruksion, kasta metlaeng ti nabayag a panagtudo a nangpabuntog kadagiti kasapulan a maaramid.
Nangilatang ti Tourism Infrastructure and Enterprise Zone Authority iti P500 milion para iti rehabilitasyon iti Burnham Park, nga isut umuna a nagpokus iti Burnham Lake ken athletic bowl.
Karaman kadagiti summaruno a lebel iti proyekto ti panangpasayaat ken panang-upgrade iti Children’s Park, Rose Garden, skating rink, ken dagiti aglawlaw a lugar.
