Pormal nga ipakaammo iti Venezuela iti United Nations iti desisyonda a panagsanod iti International Criminal Court (ICC) a mapapati nga addaan iti “geographical bias” kontra kadagiti pagilian iti Global South, partikular iti Africa ken Latin America.
Sigun kenni Foreign Minister Felix Plasencia, ti addang ket “irrevocable” ken karaman iti panagkedked iti gobierno iti imbestigasion iti ICC mainaig dagiti krimen kontra iti sangkatauhan a maipagarup nga inaramid dagiti opisiales ken miembro ti militar ti Venezuela sipud pay idi 2017.
Imbinglay pay ni Acting President Delcy Rodriguez a ti ICC ket nagbalin a politikal nga instrumento tapno atakein ti estado ken tattao iti Venezuela isu gapo a saanen mamati iti nasao nga institusyon.
Maipalagip a idi Disyembre 2025 ket nagbotos ti National Assembly iti Venezuela a babawyen ti linteg a nanggratipika iti Rome Statue a nagsirbe a dalan iti pormal a panagsanodda iti ICC.
Kagiddan iti desisyon, inikkat met laeng dagiti miembro iti estado iti ICC ni Prosecutor Karim Khan kalpasan ti alegasion a sexual misconduct.
Ti panagsanod iti Venezuela iti ICC ket napasamak iti tengnga iti trasisyon iti politika kalpasan a maikkat iti bileg ni Nicolas Maduro ken iti panangidaulo ni Rodriguez nga asideg a kaalyado iti administrasyon ni Trump. //bombo khey reparip
