Impresenta ni Apayao Governor Elias Bulut Jr., dadaulo ti Regional Development Council – Cordillera ti State of the Region Address 2026.
Karaman kadagiti highlights ti nasao a SORA ti panangprogreso ti ekonomiya ti rehiyon Cordillera no sadino agtaltalinaed daytoy kas maysa kadagiti addaan iti kasasayaatan nga ekonomiya.
Sigun kenni Bulut, Jr. nagprogreso ti ekonomiya ti nasao a rehiyon iti 4.4 % wenno katukadna iti P394.96 billion. Daytoy ti maikatlo nga kangatuan a per Capita GDP nationwide no sadino 70% ditoy ket manipud iti Services Sector; 22.6% manipud iti Industry ken 7.4% manipud iti Agriculture, Forestry and Fishing.
Kabayatanna, 47% ti nagbalin a kontribusyon ditoy ti siudad ti Baguio, 23% ti Benguet; 7.9% manipud Kalinga; 7.5% manipud Ifugao; 6.8% manipud Abra; 4.3% manipud Mountain Province; ken 3.2% manipud Apayao.
Malaksid iti dayta, kinuna ni Bulut Jr. nga agarup 100 hydropower projects ti naipaay iti rehiyon Cordillera babaen kadagiti national energy partners no sadino pakabuklan a 6,791.94 megawatts ti “in potential capacity” ken 320.92 megawatts ti adda ita iti commercial operation.
Kanayonanna, naiturnover metlaeng ti photovoltaic solar home systems kadagiti sumagmamano a komunidad iti upat a munisipyo ti Benguet.
Dinakamat metlaeng ni Bulut Jr. A mairugi ti pannakaiyemplementar ti nabukel a Cordillera Renewable Energy Master Plan 2024-2033 tapno makissayan ti panagdependar iti imported a petrolyo.
Sigun kenkuana, agtaltalinaed nga ada iti likudan ti rehiyon Cordillera nu maipapan iti digital infrastructures gapu iti saan a napundoan a priority plans ken programa iti rehiyon ken dadduma pay a pakaseknan.
Inwaragawag met ni Bulut Jr. a prayoridad da ita a tawen nga ipila ti Regional Autonomy wenno House Bill 6981 no sadino kinidawna ti publiko a makimaymaysa iti panangipila iti nasao a singasing.
Panggep dagitoy nga inton 2028 ket maadaan ti election a maipatungpal iti rehion a maitunus “coninciding” iti national ken local elections. //bombokaren.c.sapirao via Bombo Noveh Organo
