Inaklun ni sigud a security aide Orly Guteza a saan laeng a kuarta ti nangiduron kenkuana tapno agaramid iti palso a testimonya kontra kenni sigud a House Speaker Martin Romualdez.
Sigun kenni Guteza, buteng ti nangiduron kenkuana malaksid iti naikari a kuarta ken scholarship.
Mailapagip nga imbabawi ni Guteza ti immuna nga affidavit-na a nangipatulod iti minal-maleta a kuarta iti pagtaengan ni Romualdez sadiay Forbes Park Makati.
Sigun kenni Guteza, pinasuksukan daytoy ni Senador Rodante Marcoleta ken sigud a Congressman Mike Defensor.
Innayona a naawis kadagiti nasasam-it a sasao da Marcoleta ken Defensor isu’t gapuna a nadakamatna dagiti bambanag a saan a pudno.
Kabayatanna, impeksana pay nga agbab-babawi iti pannakairamanna iti kontrobersya ken kayatna nga agbiag iti natalna kadua dagiti pamilyana.
