Napagnunumuan ti Sangguniang Panlalawigan ng Benguet ti panangideklara iti State of Calamity iti probinsya ti Benguet kasaruno iti pannakailista ti agarup P1 Bilyon a danyos iti intero a probinsya gapu pay laeng iti panagduprak dagiti naglabas a bagyo ken habagat.
Iti pannakiuman ti Bombo Radyo kenni Benguet Vice Governor Marie Rose Fongwan Kepes, kinunana nga umdasen ti rason iti panangideklara iti State of Calamity manipud iti report nga insumitir ti 13 a munisipyo, kas maitunos iti Republic Act No. 10121.
Sakbay dayta, impettengna a dua metten a munisipalidad ti nangideklara iti State of Calamity – ti Munisipyo ti Atok ken La Trinidad.
Sigun iti Resolution No. 03, 2026 nga insumitir ti Provincial Disaster Risk Reduction and Management Office a nangisingasing iti pannakaideklara ti State of Calamity iti probinsya, dumanonen iti P1,068, 531,128.31 ti pakabuklan a gatad ti danyos iti nagduduma a sektor iti probinsya.
Agarup 6,362 a mannalon ti naapektaran gapu iti panagdalapos dagiti habagat ken bagyo no sadino agarup P315.5 Milyon ti nailista a danyos iti agrikultura ken agarup P318.6 Milyon met ti danyos iti Livestock, Poultry, Fishery, ken Farm Structures.
Kabayatanna, dumanon met iti agarup P749.8 Milyon ti nairekord a danyos iti imprastraktura iti probinsya no sadino kaaduan kadagitoy ket dagiti nadadael a kalsada ken rangtay.
Impetteng met ni Vice Governor Fongwan-Kepes a mannarimaan ti augmentation para iti pannakaipaay ti assistance para kadagiti naapektaran.
Kinuna pay a pagsasaritaanda iti ehekutibo dagiti kanayunan a tulong a maipaay kadagiti umili.
Nagpallagip met daytoy iti publiko nga ipangpangrunada ti seguridad dagitoy gapu ta agingga iti agdama ket mapaspasaran pay laeng ti probinsya ti pangta iti saan a nasayaat a sasaaden ti panawen.
Maipalagip nga apaman a naideklara ti State of Calamity iti maysa a lugar, maipaay metten ti karbengan daytoy a maaramat ti 30% Quick Response Fund iti sidung ti 2026 Local Disaster Risk Reduction and Management Fund (LDRRMF) para iti relief ken recovery programs.
Malaksid iti dayta, maipataw ti price freeze kadagiti kangrunaan a gagatangen ken manamnama ti naparpartak a rehabilitation iti nasao a lugar.
Kabayatanna, maururay metten ti Resolution for Declaration seknan iti daytoy. // from Bombo Jerwin Aquino report//
BUYAEN ti pannakiuman ti Bombo Newsteam kenni Benguet Vice Governor Marie Rose Fongwan Kepes:
