Agtultuloy ti search and rescue operation nga isaysayangkat dagiti otoridad ken dagiti volunteers idiay Atok para iti pannakasarak ti senior citizen a ni Mr. Rogelio B. Sawey.
Impetteng met ni Atok Vice Mayor Edward S. Beliano kadagiti rescue team ti kinapateg ti seguridad kabayatan iti maipatpatungpal a search and rescue operation sadiay nangnagruna iti panagobserbar iti buddy system, umno a panagaramat kadagiti safety gear, ken agtultuloy a koordinasyon kadagiti lokal a residente a pamilyar iti lugar.
Kagidan dayta, nagpallagip met ni Hon. Charlie S. Lingbanan iti panagbalin nga alerto nangnangruna iti pabaliw-baliw a paniempo tunggal malem.
Agtultuloy met ti koordinasyon ti lokal a gobyerno kadagiti kabagyan, Barangay Disaster Risk Reduction and Management Offices, Bureau of Fire Protection, community volunteers, ken dadduma pay para iti nasao nga operasyon.
Iti kaudian nga update ita nga aldw, adda ti tallo a priority areas a pangsarakanda iti biktima pakairamanan ti paset ti Amburayan River idiay Naguey ken Pasdong ken tributary creek manipud Paoay ken Cattubo downstream.
Makidkiddaw latta iti publiko nga ipakaammoda a dagos iti otoridad apaman nga adda dagiti maawatda nga impormasyon seknan iti mapukpukaw a senior citizen.
