--Ads--
Pinatgan ti International Criminal Court (ICC) ti pannakairaman ti pito a kanayonan nga insidente iti kaso a crimes against humanity kontra kenni sigud a President Rodrigo Duterte.
Gapu iti daytoy, dumanon iti 56 ti dagup a bilang dagiti insidente a nairaman iti kaso, ngimmato no idilig idi napalabas a dumanon iti 49 nga insidente.
Sumangsango ni Duterte iti tallo a kaso a murder a naklasipikar kas crimes against humanity, mainaig iti maatap a pammapatay sadiay Davao City ken ti kampanya kontra droga manipud 2013 agingga 2018.
Sigun iti police records, nasurok iti 6,000 a tattao ti pimmusay gapu iti drug war, ngem mapattapatta a dumanon iti 30,000 ti dagup a bilang dagiti pimmusay, agraman dagiti maipagarup a biktima ti vigilante killings.
