Makidkiddaw ti tulong ti publiko para iti pannakarisut dagiti sumagmamano nga isyu a sangsangwen ti siudad ti Baguio.
Sigun kenni Baguio Councilor Edison Bilog, saan laeng a ti LGU ti addaan iti akem para iti pannakasulbar ti gambling issue no diket uray metlaeng ti komunidad.
Iti pannakaiuman ti Bombo Newsteam kenni Councilor Bilog, kinunana nga adda ti innem a barangay a manarimaan nga iberberipikar dagiti otoridad kalpasan a maatap nga addaan dagitoy iti drop ball-an a maiparit iti sidong ti Presidential Decree No. 1602 (PD 1602) ken Republic Act No. 9287 (RA 9287).
Imbinglay ti konsehal, nga adda ti pending nga ordinansa nga insumitir daytoy no sadino, naprobaran iti second reading.
Parikut metlaeng dagiti dadduma nga ilegal a pasugalan nga adda kadagiti nagduma-duma a barangay ken mall a kas iti e-games wenno e-bingo.
Inlawlawag ti nasao nga opisyal nga iti kanito a maaprubran ti ordinansa, uray adda ti permit ti sugalan ket maipaayan laeng iti umdas nga aldaw nga ag-operate sakbay a maipaserra.
Innayun daytoy nga iti kanito nga aglabsing dagiti operator wenno agtagikua kalpasan a naipaserra daytoy, mabalin a sumango dagitoy iti agarup innem a bulan a pannakaibalud ken agarup P5,000 a multa.
Kabayatanna, kinuna ni Councilor Bilog nga aramidenda amin a kabaelan dagitoy tanpo ma-control ngem no saan ket maitotally ban ti sugalan kas sadiay Pasig City.
Mainaig iti dayta, agtultuloy ti koordinasyon ti lokal a gobierno iti siudad ken ti pulisya seknan iti daytoy.//Bombo Noveh Organo
