Nakasagana dagiti prosecutors a mangkuestion kenni Vice President Sara Duterte ken ti asawana a ni Atty. Manases “Mans” Carpio no awagan ti depensa nga testigo dagitoy iti impeachment trial.
Sigun kenni prosecution spokesperson Atty. Jay Tolosa, kasapulan nga ilawlawag ni Duterte ti nagdumaan ti ₱98 million nga indeklarana iti Statement of Assets, Liabilities, and Net Worth (SALN) ken ti ₱100 million a naduktalan iti financial transaction daytoy.
Kayat metlaeng ti prosekusion a saludsuden ni Carpio mainaig kadagiti sanikua ken ti 47.5% share daytoy iti negosyo a Cale88.
Saludsudenda metlaeng ti alegasion a nakaawat dagiti agassawa iti ₱319.3 million a remittance manipud sadiay China.
Malaksid iti dayta, sukimaten metlaeng ti prosecution dagiti bank account ni Duterte, joint account dagitoy iti amana a ni sigud a President Rodrigo Duterte ken dagiti transaksion a nakanagan kenni Carpio.
Inyuna-unay ni Tolosa a saan a rumbeng a maibasar iti popularidad ti desisyon iti impeachment case no diket dagiti ebidensiya a sangsangwen ken ti kabaelan ti depensa a mangilawlawag kadagiti alegasion.
