--Ads--

Inyunay-unay ti Baguio General Hospital and Medical Center (BGHMC) ti kinapateg ti panangpapigsa iti panagtitinulong dagiti traditional health practitioners ken dagiti modern medical institutions tapno maliklikan ti pannakaitantan ti umiso a pannakataming dagiti addaan iti sakit.

Sigun kenni Dr. Vladi Natasha Q. Cruz, Medical Officer IV manipud iti Department of Family and Community Medicine iti BGHMC, adda dagiti residente, nangruna kadagiti agnanaed kadagiti adayo a komunidad, a mangpili nga umuna a mapan kadagiti traditional wenno herbal healers imbes a dagus nga agturong iti ospital gapu iti kinaasidegda kadagiti pagtaenganda.

Gapu iti daytoy, impaganetget ni Cruz a masapul nga agkaykaysa dagiti traditional health practitioners ken modern medical practitioners ken panagtitinulongda a mangipasigurado a maipaay ti umiso ken natalged a panangtaripato iti salun-at dagiti umili.

Inlawlawagna met nga iti paset ti Philippine Institute of Traditional and Alternative Health Care (PITAHC), maysa nga ahensya babaen ti Department of Health a mangitag-ay, dagitoy ti mangsukisok ken mangregulate kadagiti traditional ken alternative health care practices tapno maipasigurado a natalged, epektibo ken maibasar iti siyentipiko a pamuspusan dagitoy.

Sigun pay ken Cruz, adda dagiti benepisyo dagiti tradisyonal a pamuspusan ti panangagas, nangruna no mausar dagiti nainkalintegan ken nasayaat a pamuspusan. Nupay kasta, masapul latta a maammoan dagiti umili no ania dagiti pagpaagasan ken dagiti herbal medicines a mausar tapno maliklikan ti nga umno a panagusar kadagitoy ken dagiti mabalin a epektona iti salun-at.

Gapu iti daytoy, binigbigbig ni Cruz a masapul ti edukasyon ken adadda a panangiturong kadagiti umili tapno ammoenda no kaano a masapul ti tulong dagiti doktor, nangruna no seryoso wenno agtultuloy ti sintomas ti maysa a sakit.

Impakpakaammo na met a nupay adda dagiti agpili kadagiti traditional healers gapu ta asidegda ken nalaklaka a madanon, masapul a maawis dagitoy a mangammo ken mangtingiting iti kredibilidad ken seguridad dagiti pagpaagasan ken produkto a maaraat sakbay nga ipakat dagiti pamuspusan ti panangagas.

Iti kamaudiananna, impaganetgetna ti kinapateg ti panagkaykaysa dagiti komunidad, traditional health practitioners ken dagiti propesyonal iti salun-at tapno saan a maitantan ti umiso a panangagas ken maipaay ti natalged a serbisio medikal kadagiti umili. //via Bombo Khey Reparip