BAGUIO CITY – Al-allukuyen ni PNP Chief Police General Camilo Pancratius Cascolan ti Police Regional Office Cordillera a karkaro pay a mangpatibker iti programa kontra iti iligal a droga.
Kinunana a masapul a mairtengan dagiti maipatpatungpal a marijuana eradication iti nagduduma a paset ti Cordillera.
Inbalakad pay ti PNP Chief ti agtultuloy a panagpatrolya ti pulisya ken ti pannakaipasdek ti Assistance Desk iti tunggal Barangay.
Kinunana a masapul met a mapasayaat ken mapatibker ti PNP Response team.
Kagiddan iti daytoy, guyguyuguyen ni Cascolan dagiti umili a dagusda nga ireport iti pulisya dagiti makita wenno maammuanda nga iligal nga aktibidad.
Maipalagip nga indauluan ni Cascolan ti ceremonial burning ti P20-M a gatad ti marijuana sadiay Camp Bado Dangwa, La Trinidad, Benguet idi kalman.
