Pimmusay ti agarup 148 nga indibidual kalpasan a nauram ken nabaliktad ti bangka idiay pagilian a Congo itay laeng kanikadua.
Naglaon ti bangka iti lima gasut a pasaheros pakairamanan dagiti babbai ken ubbing idi nabaliktad daytoy iti Congo river a masarakan iti northwest region iti nasao a pagilian.
Ti panagbaliktad ti bangka idiay Congo ket kadawyan a mapasmapasaran nu sadinno, dagiti kayo ken daan a bangka ti kangrunaan a kita ti transportasion.
Sigun kadagiti otoridad, mapatta-patta a ginasgasut nga indibidual ti mapukpukaw.
Immunan nga impadamag dagiti otoridad a pimmusay ti mapatta-patta a limapulo nga indibidual.
Agarup sangagasut met a 100 ti dagos a naiturong kadagiti temporario a pagtaengan, bayat a dagiti nadangran iti uram ket naiturong kadagiti lokal nga ospital.
Maibasar iti imbestigasion, sumagmamano a pasaheros, pakairaman dagiti babbai ken ubbing ti pimmusay kalpasan a limmagto dagitoy iti baybay a saanda nga ammo ti aglangayoy.
Maipalagip nga idi 2024, agarup 78 a tattao ti nalned idi bimmaliktad ti bangka a naglaon ti 278 iti Lake Kivu, eastern Congo.
Iti sabali pay nga insidente, agarup 22 nga indibidual ti pimmusay kalpasan a nalned ti bangka idi Disiembre iti western Congo.
